EHUko Kultura Zientifikoko Katedrak antolatuta, Bilbo Zientzia Plaza (BZP) jaialdiak zientzia dibulgazioa sustatuko du hirian, hitzaldi, tailer, erakusketa eta ikuskizun zientifikoz betez. Aurten, Naukas Bilbaoren berrikuntza eta BZP Tailerrak dira berritasun nagusiak.
Jaialdiaren egitaraua Bilboko hainbat gunetan garatuko da, besteak beste, Bidebarrietako Liburutegian, Bizkaia Aretoa-EHUn, Euskalduna Bilbaon, Arte Ederren Museoko aurrealdean eta EDE Fundazioaren Guruzu Plaza gunean. Jarduera guztiak doakoak izango dira, tokiak bete arte, eta batzuetan aurrez izena eman beharko da.
Naukas Bilbao, estatuko zientzia-dibulgazioko ikuskizun nagusiak, formatu berria estreinatuko du. Irailaren 18tik 20ra, Euskalduna Bilbao jauregiak jarduera desberdinak hartuko ditu: Naukas Gazte (DBH, batxilergo eta lanbide heziketako ikasleentzat), Naukas Bilbao Hastapenak (publiko orokorrarentzat) eta Naukas Kids (haurrentzat). Naukas Kidsen programazioa Bizkaia Aretoa-EHUn eta inguruetan ere zabalduko da.
Haurrei eta familiei zuzendutako jarduerak zabalduko dira aurten, BZP Tailerrak ekimen berriarekin. Ikuskizunak, tailerrak, antzerki-emanaldiak eta lehiaketak izango dira irailaren 24an, 26an eta urriaren 4an, Bizkaia Aretoa-EHU eta EDE Fundazioaren Guruzu Plaza guneetan.
Jaialdia irailaren 16an hasiko da Bidebarrietako Liburutegian, Natura Bizia dokumentalaren proiekzioarekin, eta ondoren lantaldearekin solasaldia izango da. Bidebarrieta Zientifikoa zikloaren barruan, irailaren 30ean, entomologiari buruzko hitzaldia eskainiko du Beatriz Díaz biologoak.
Intsektuak izango dira aurtengo edizioko protagonista nagusiak. Horiei eskainitako hitzaldi-solasaldia, bi tailer eta Intsektuak. Kontatzen duten guztia erakusketa antolatu dira, Nafarroako Unibertsitateko Zientzia Museoarekin elkarlanean. Erakusketa irailaren 19tik urriaren 4ra egongo da ikusgai Bizkaia Aretoa-Ehun, eta intsektuen aniztasuna ezagutzeko aukera emango du.
Erakusketa inklusibo eta irisgarria izango da. Urriaren 4an, Sergi Romeu entomologoaren tailer batekin itxiko da, non parte-hartzaileek animaliak gertutik ezagutu eta ukitu ahal izango dituzten.
Bilbo Zientzia Plaza (BZP) ekimena EHUko Kultura Zientifikoko Katedrak antolatzen du, Euskampus Fundazioaren laguntzarekin eta Bilboko Udalaren, Eusko Jaurlaritzako Zientzia, Unibertsitate eta Berrikuntza Sailaren, Donostia International Physics Center (DIPC), EITB eta Nafarroako Unibertsitateko Zientzia Museoaren babesarekin.
