Irunen, AP-8 autobidean auto-ilara luzeak izan dira berriro Frantziako norabidean, zazpi kilometrorainokoak. Trafiko dentsitate handia izan da goizean zehar, baina arratsaldean larriagotu egin da egoera, Eusko Jaurlaritzako Segurtasun Sailaren arabera.
Arratsaldeko 19:30ak aldera, ilarak 2-3 kilometrokoak ziren jada, eta egoera pixkanaka hobetzen ari dela dirudi. Hala ere, gidariei kontuz ibiltzeko gomendatzen zaie eremu horretan.
Egoera hau ez da berria, izan ere, joan den ostegunetik errepikatzen ari da. Abuztuaren 13an gertatu zen uda osoko kolapso handiena, Irunen 14 kilometroko eta Zarautzen 8 kilometroko ilarekin. Horrek Irun hiria ere erabat kolapsatu zuen.
Iruneko Udala, trafiko masiboak zuzenean kaltetua, bere itzulerako operazio plana aurreratu zuen ekilpsearen egunerako, baina operazio hori ez zen gauzatu. Horrek eragin zuen Frantziarako bidean zihoazen gidariak hirian harrapatuta geratzea, autopista ordainpeko bat eta errepide nagusi bat (GI-636) baino ez duena.
Gidariak Zarauzko ordainlekuan hasi ziren pilatzen, 8 kilometroko auto-ilara batekin. Ondoren, Errenteriatik mugara arteko 14 kilometroko auto-ilara izan zen AP-8an. Alternatibak bilatzeak GI-636 errepidea erabat kolapsatu zuen, baita Oiartzun eta Irun arteko GI-2134 eta Arkale igotzeko bidea ere.
