Ekimenak irun.market plataformaren hobekuntza nabarmena ekarri du. 2025eko urtarriletik, atari horretan erregistratutako pertsonen kopurua 110etik 755era igo da, eta aktibo dauden saltokien kopurua 22tik 33ra hazi da. Hazkunde hori ordainketa-sistema seguruagoak eta interfaze intuitiboagoak ezartzeari esker lortu da.
Proiektuaren beste ardatz nagusia etxeko farmazia-arreta pilotua da. Gipuzkoako Farmazialarien Elkargo Ofizialak, Irungo Udaleko Gizarte Ongizate eta Berdintasun Arloak eta Osakidetzako Bidasoko ESIak elkarlanean, arreta pertsonalizatua eskaintzen diete kolektibo zaurgarriei, botikak banatzeaz gain, pazienteen beharrak eta atxikimendua aztertuz.
Banaketa-eredua ere eraldatu da, Badoa enpresa lokalaren bizikleta bidezko zerbitzua erabiliz, hiriko banaketa-jarduerak eragiten duen ingurumen-inpaktua murrizteko helburuarekin. Proiektua Kutxa Fundazioaren 2024ko erronka ekosozialetarako laguntzen deialdiaren baitan garatu da.
