Zeberioko Sandoniak jaiak hasiko dira gaur, irailaren 2an, eta irailaren 7ra arte luzatuko dira. Egitarauak hainbat jarduera biltzen ditu, hala nola Porrotx, Marimotots, Pupu eta Lore pailazoen ‘Zerua lapurtu dute’ ikuskizuna, etxeko txikienentzat, gaur arratsaldeko 18:00etan herriko plazan. Katxiporreta konpainiaren lan honek izarrak desagertzearen misterioa jorratzen du.
Udalak 116.000 euro bideratuko ditu udalerriko hainbat auzotako errepideak konpontzeko. Lan hauek Gezala, Elorrea, Undurraga, Solatxi, Bekolanda eta Zubialde auzoetan egingo dira, Bizkaiko Foru Aldundiaren dirulaguntzarekin. Helburua egungo zuloak estali eta bideak hobetzea da, eta lanak 2027ko ekainaren 30a baino lehen amaitu beharko dira.
Gazte Elkarteak ere bere egitaraua prestatu du Gazte Txosnan, suzko zezena, DJ Radiopatio eta makarronada, besteak beste. Gainera, irailaren 5eko gauean, doako gaueko taxi zerbitzua eskainiko da Ugaotik Igorrera arteko ibilbidea egiteko, 21:00etatik 03:00ak bitartean. Zerbitzua erabili nahi dutenek 609 610 855 telefono zenbakira deitu beharko dute.
Aurtengo jaietan, besteak beste, elektrotxarangak, txapelketa gastronomikoak eta haurrentzako jolasak izango dira. Zeberio eta Arteako kideez osatutako Tukanon taldeak ere kontzertua eskainiko du Bilboko Aste Nagusian, abuztuaren 27an, Euskalgunean.
