Arabako Foru Museoen Sareak ekainean, uztailean, abuztuan eta irailean egingo dituen bisita gidatuen programazioa aurkeztu du. Horrela, Kexaako Monumentu Multzorako eta Arabako Arte Ederren Museorako proposamen berriak egin ditu, herritarrei lurraldeko ondare historiko eta artistikoaz hurbiltzeko aukera emanez, publiko desberdinei zuzendutako eta egokitutako esperientzien bidez.
Kexaako Monumentu Multzorako bisitak ekaineko eta iraileko asteburuetan izango dira, eta uztailean eta abuztuan, ostiral, larunbat eta igandeetara luzatuko dira. Berrikuntza gisa, udako ostiraletan arratsaldez bisita bereziak egingo dira, antzeztutako ikuskizun labur batekin.
Jardunaldi bakoitzean bi talde arituko dira aldi berean, bata euskaraz eta bestea gaztelaniaz, eta alderantzizko ibilbideak izango dituzte esperientzia hobea bermatzeko. Larunbatetan eta igandeetan, bisitak 12:00etan hasiko dira eta ordubete inguru iraungo dute. Uztaileko eta abuztuko ostiraletan, berriz, 19:00etan izango dira, eta ordubete eta laurden inguru.
Bestalde, Arabako Arte Ederren Museoak bisita gidatuak eskainiko ditu Francisco de Goyaren grabatuei eskainitako 'Fantasia eta Arrazoia' erakusketara. Proposamen honek espainiar artistaren lan grafikoan eta bere testuinguru historiko eta sortzailean sakontzeko aukera ematen du.
Bisita hauek egunero talde bakar batekin egingo dira, euskaraz edo gaztelaniaz. Asteazkenetan 17:00etan izango dira, eta igandeetan 12:00etan, ordubete inguruko iraupenarekin.
Programazio honekin, Arabako Foru Aldundiak kultur ondarea zabaltzeko konpromisoa indartu nahi du, proposamen irisgarriak eta kalitatezkoak eskainiz, lurraldearen historia, artea eta nortasuna ezagutzera eta gozatzera gonbidatuz.
Bisita guztiak doakoak dira, baina plazak mugatuak direnez, aldez aurreko erreserba beharrezkoa da. Arabako Arte Ederren Museorako, 945 18 19 18 telefono zenbakira deituta edo museobellasartes@araba.eus helbidera idatzita egin daiteke. Kexaako Monumentu Multzorako, berriz, 945 101 070 telefonoan edo web orriaren bidez.
