Kantsatzeke mendi taldeko kideek Arabako mendialdera bideratuko dute maiatzeko irteera. Proposatutako ibilbideak San Justi, Arluzea eta San Kristobal tontorrak igotzea aurreikusten du. Antolatzaileek adierazi dutenez, nahiz eta aldapa batzuk izan, ez da ibilbide oso aldapatsua, guztira 478 metroko desnibela gaindituko baita 15 kilometroko distantzian.
Mendi buelta lau edo bost ordukoa izango dela aurreikusten da. Apilaiz herritik abiatuko dira, eta bertan izango da eguneko aldaparik gogorrena, indarrak gastatzeko. Ondoren, ibilbidea nahiko leuna izango da, Txarabitana eta Postariaren bideetatik igaroz. Parte-hartzaileek herri txiki polit bat, gaztainondo zaharrak, presa txiki bat eta harrian sortutako arku bat ikusteko aukera izango dute.
“"Mendi tontorretatik, besteak beste, Izkizko mendiak eta Arabako Mendialdeko herri eta parajeak ikusiko ditugu."
Ibilbide honetarako izen-ematea zabalik dago hilaren 21era arte. Interesdunek kantsatzeke@gmail.com helbidera idatziz edo 690 74 00 56 telefono zenbakira (Whatsapp) deituz eman dezakete izena. Taldea goizeko 08:00etan abiatuko da herriko plazatik, eta prezioa 10 eurokoa da. Adin txikikoek guraso edo nagusi baten ardurapean parte hartu ahal izango dute.
