Proiektu honen bidez, Eurasia Zetaren Bidea zeharkatuko dute, bidean mendi jarduera arinak eginez. Abentura Singapurretik hasiko da datorren irailaren 1ean edo 2an, eta hamar edo hamabi hilabetetan 12.000 kilometroko ibilbidea osatzea aurreikusten dute.
Proiektuaren xehetasunak Azpeitiko udaletxean aurkeztu dira gaur, Kirol batzordeburuarekin batera. Batzordeburuak adierazi duenez, Kokorotos Bike Life proiektuaren originaltasuna izan da epaimahaiak beka emateko erabakia hartzerakoan gehien baloratu duena. Joxe Urbieta Takolo mendizale azpeitiarraren omenez ematen da beka hau.
“"Zoriontsu bidaiatu nahi duenak, arin bidaiatu behar du. Bizikletaz bidaiatu izan dugun aldiro, oso gutxi eraman izan dugu baina oso zoriontsu izan gara."
Proiektuaren sustatzaileek azpimarratu dute bizikletaz bidaiatzeak pertsonenganako, naturarekiko eta kulturarekiko hurbiltasun berezia ematen diela, eta kanpoan egondako bakoitzean etxean sentitu direla. Abentura honek, kirol erronka izugarria izateaz gain, bidaiatzeko eta bizitzeko filosofia baten isla izango da, Pamir aldeko mendiak zeharkatzea barne.
Bidaian zehar ikusitakoak eta ikasitakoak jasotzeko asmoa dute, eta itzultzean, esperientziak partekatzeko ordu erdiko film labur bat egitea aurreikusten dute. Gainera, bidaiaren nondik norakoak Instagram bidez jarraitu ahal izango dira hilabete hauetan.
Kokorotos Bike Life proiektuak 23.000 euroko aurrekontua du. Horietatik bi heren beraiek jarriko dituzte, eta Joxe Takolo bekaren 4.000 euroak ekarpen garrantzitsua izango dira. Horrez gain, Gofundme plataformaren bidez finantzaketa kolektiboa martxan jarri dute, eta babesle gehiago bilatzeko aliantzak jorratu nahi dituzte.
