Astelehen arratsaldean, Gasteizko Foru plazan, askotariko 47 eragilek deituta, ehunka pertsona bildu ziren Errekaleor Bizirik proiektuak duela bi aste jasandako eraso larriaren aurrean. Ekimenaren helburua ez zen soilik elkartasuna adieraztea, baita gertaeren oinarrian kokatzen duten diskurtso faxista arbuiatzea ere.

Manifestazioak aniztasun handia batu zuen, auzogintza bultzatzen duten kolektiboak, eragile antirrazistak, bazterkeriaren eta pobreziaren aurka lan egiten dutenak, sindikatuak eta elkartasun sareak tartean zirela. Antolatzaileek adierazi zutenez, Vox alderdiak Errekaleorren zabaldutako diskurtsoa eta hori bere egin duten Ertzaintza zein zenbait arduradun politiko salatu nahi zituzten.

Gertaeren berri ematean, maiatzaren 13an izandako erasoa gogoratu zuten: kalean bizi ziren pertsonak auzoko etxeetan sartzen saiatu zirela, modu oldarkorragoan, zenbait pertsona zaurituz, eta Ertzaintzaren babes zuzena izan zutela. Gainera, maiatzaren 14ko eraso bortitzean larri zauritutako Errekaleorreko kide bat ospitalean ingresatuta egon zela eta begi bateko ikusmena galdu duela jakinarazi zuten.

Antolatzaileek salatu dute gertatutakoaren oinarrian "ideologia faxista" dagoela, eta Vox alderdiak sustatutako diskurtsoa Ertzaintzak eta zenbait alderdik bere egin dutela. Arrazakeria eta zapalduen arteko banaketa sustatzea leporatu diete, eta kalean bizi diren pertsonen egoeraren instrumentalizazioa salatu dute.

Maider Etxebarria alkatearen eta Bingen Zupiria Segurtasun sailburuaren adierazpenak kritikatu zituzten, faxista logikak elikatu dituztelakoan. Udalari irtenbide duin bat bermatzeko eskatu diote, besteak beste, "hirian dauden etxebizitza hutsak" erabilita, eta Segurtasun Sailari barne ikerketa abiatzea eskatu diote.

Eragileek konpromisoa agertu zuten faxismoaren aurka elkarlanean aritzeko, eta elkartasuna adierazi zieten Ertzaintzak kolpatu eta atxilotu zituen Global Sumud Flotillako kideei, baita Alaves futbol taldeko zaleei eta Alde Zaharreko auzokideei ere.