Astearte arratsaldean, 17:00 ak pasatxo zirela, sute bat piztu zen Aernnova ren Berantevillako instalazioetan, pintura gune isolatu batean. Nahiz eta kea lantegi osora zabaldu zen, suak ez zuen gune horretatik kanpo eragin, eta horrek erraztu egin zuen kontrola.

Sutearen ondorioz, lantegia berehala hustu behar izan zen. Espejo, Nanclares eta Miranda de Ebroko suhiltzaileak bertaratu ziren, baita Ertzaintzako unitateak eta anbulantziak ere, balizko zaurituak artatzeko. Zorionez, ez zen kalte pertsonalik izan.

Pintura gunea erabat kiskalita geratu zen, eta suhiltzaileek denbora luzez jarraitu zuten lantegia aireztatzen. Aernnovak kalteak ebaluatuko ditu asteazkenean, ekoizpena ezin izan baitzen berriro martxan jarri asteartean. Pintura unitatea suntsituta dago, eta urak eta keak eragindako kalte txikiagoak ere espero dira beste gune batzuetan.