Bilbo izango da datorren azaroaren 24an eta 25ean ADAPT AKTION Euskadi 2050 topaketaren egoitza. Ekitaldi honek klima-aldaketara egokitzeko azken zazpi urteetako lanaren emaitzak eta ikasbideak partekatuko ditu, baita hurrengo hamarkadan aurre egin beharreko erronkak ere.
Topaketa hau Industria, Trantsizio Energetiko eta Jasangarritasun Sailak eta Ihobe Ingurumen Kudeaketako sozietate publikoak bultzatzen dute, LIFE IP Urban Klima 2050 proiektu europarraren gidaritzan. Proiektu hau Euskadin azken urteetan egindako klima-ekintzako proiekturik handiena da, eta 23 erakundek parte hartu dute bertan.
ADAPT AKTION ekitaldian, 150 espezialista baino gehiagok, proiektu europarrek eta Euskadiko klima-ekintzako eragileek parte hartuko dute. Bertan, Urban Klima 2050 proiektuaren zazpi urteko lanaren emaitzak eta ikasbideak ezagutaraziko dira, eta datozen hamarkadetako klima-aldaketara egokitzeko erronkak aztertuko dira.
Programak hainbat eduki izango ditu, besteak beste, Europako erresilientzia-esparru berriari eta finantzaketa-programei buruzko ponentziak, proiektu europarren arteko truke-guneak, Euskadin garatutako esperientziei eskainitako mahai-inguruak eta Araba, Bizkaia eta Gipuzkoan egindako jarduketen bisita teknikoak.
Nazioarteko espezialistek eta klima-aldaketara egokitzeko erronkak ere izango dira hizpide. Parte-hartzaileen artean izango dira Paloma Aba Garrote, CINEAko (European Climate, Infrastructure and Environment Executive Agency) zuzendaria, eta Bruno Mola, Europako Batzordeko Klima Ekintzarako Zuzendaritza Nagusiko Hiri eta Tokiko Klima Ekintzaren arduraduna. Horrez gain, meteorologo eta dibulgatzaile zientifiko Isabel Morenok 'Entender el clima para transformar el futuro' hitzaldia emango du.
Ekitaldiak COP31ren ondorio nagusiak eta klima-aldaketara egokitzeko erronkak aztertuko dituen saio bat ere izango du. '¿Y ahora qué? Lecciones, señales y retos tras la COP31' mahai-inguruan Natalia Uribe (Regions4), María José Sanz (BC3) eta Julen Rekondo arituko dira.
Bigarren jardunaldian, parte-hartzaileek Arabako, Bizkaiko eta Gipuzkoako hainbat proiektu bisitatzeko aukera izango dute, hala nola, Arabako Jundizko korridore berdea eta Vitoria-Gasteizko Ataria; Bizkaiko Bakio eta Tonpoi (Bermeo); eta Gipuzkoako Zarautz eta Donostiako Errekatxulo.




