María Nanclares Ekonomia Sustapen, Enplegu, Merkataritza eta Turismo zinegotziak gaur goizean parte hartu du ekimenaren aurkezpenean. Kanpaina Gasteiz On eta Zabalgana Batuz elkarteek bultzatu dute, eta Udalak babesten du. Gainera, Arabako Foru Aldundiaren, Baskonia-Alavés Fundazioaren eta Viajes Azulmarino enpresaren laguntza du.
Aurkezpen ekitaldian David Brea Zabalgana Batuz elkarteko presidenteak, Patricia García Gasteiz On elkarteko gerenteak eta Naroa Romo Naroa Informática enpresaren jabeak ere hitz egin dute.
“"Udalaren lehentasunetako bat gure hiriko merkataritza dinamizatzea da, oraingo honetan hiriko auzo emergenteetako batean. Horregatik babesten dugu proposamen hau. Zabalganan bizi direnak eta aukera hau galdu nahi ez dutenak auzo honetako tokiko merkataritzan erostera animatzen ditugu. Opari interesgarrien zozketan parte hartu ahal izango dute. Apirilaren 15etik maiatzaren 15era."
'Erosi eta irabazi Zabalganan' kanpainak auzoko tokiko merkataritzan kontsumitzearen garrantzia azpimarratzen du. Apirilaren 15etik maiatzaren 15era bitartean, parte hartzen duten negozioetan egindako erosketa guztiek, Gasteiz On elkarteko kide izan ala ez, sari desberdinen zozketan parte hartzeko aukera emango dute.
Parte hartzeko, nahikoa da harremanetarako datuak erosketa-txartelaren atzealdean idatzi eta establezimenduetan egongo diren kutxetan sartzea. Ekimena Vitoria-Gasteizko Udaleko Merkataritza Zerbitzuak babesten du, Arabako Foru Aldundiko Merkataritza Sailaren laguntzarekin.
Guztira 42 negozio, hala nola tabernak eta kafetegiak, jatetxeak, farmaziak, osasun eta edertasun dendak edo elikagai-dendak, kanpainari atxiki zaizkio. Guztiak erraz identifika daitezke erakusleihoetan jarritako karteletatik, eta Gasteiz On webgunean kontsulta daitezke. Sariak 50 euroko 'Regala Gasteiz' txartel bat, bi pertsonentzako asteburuko bidaia bat eta Baskonia eta Alavés taldeen partidetarako sarrerak izango dira, Gasteiz On, Azulmarino Viajes eta Baskonia Alavés Fundazioaren eskutik, hurrenez hurren.
