San Andres kiroldegiak bi hamarkada bete ditu eta ospakizun hau herritarrekin partekatu nahi du. Ekitaldi berezi honetan, kirolak izango du protagonista nagusia, eta hainbat klubek beren jarduerak erakutsiko dituzte, baita publikoak parte hartzeko aukera ere izango du.
Miren Fernandez de Landa, Gobernu Ireki eta Zentru Zibikoen zinegotziak, herritarrak gonbidatu ditu San Andresera gerturatzera eta ospakizunean parte hartzera. "20 urte betetzea ospakizun arrazoia da, baina baita ere esker ona adierazteko aukera, kiroldegi hau bi hamarkadetan zehar espazio bizi, ireki eta jardueraz betea izan dadin ahalbidetu duten pertsona guztiei", adierazi du.
Programazioa instalazioaren hainbat gunetan izango da. Igerileku nagusian, Urdantza igeriketa sinkronizatu taldeak erakustaldia eskainiko du 17:00etatik 18:00etara, eta ondoren, bertaratuek igerian aritzeko aukera izango dute. Jarraian, 18:00etatik 19:00etara, Nereida Sub taldeak urpeko hockey erakustaldia egingo du, eta parte hartzeko aukera ere emango du.
Igerileku txikian, 17:40tik 18:20ra, aquagym saio bat izango da. Kantxan, 17:00etatik 19:00etara, Arriaga klubarekin badminton eta Gasteiz klubarekin mahai tenisa jokatuko ahal izango da, baita pickleball, zirkuituak eta indiakak ere.
Kanpoko saskibaloi pistetan, 17:00etatik 18:30era, zumba saio bat izango da, eta ondoren, luzaketak. Padel pistetan, berriz, 15 eta 20 minutuko partidak jokatuko dituen torneo bat antolatu da. Izena eman nahi dutenek aurrez aurre egin beharko dute kiroldegian bertan.
Fernandez de Landak azpimarratu duenez, "programazioak islatzen du zehazki zer nahi dugun urteurren bat izatea: ospakizun anitza, parte-hartzailea eta adin guztientzakoa, non pertsona bakoitzak interesatzen zaion jarduera bat aurki dezakeen".
Urteurrenaren ospakizunak kluben inguruko argazki erakusketa bat ere badakar. Erakusketa hau kiroldegian bertan egongo da eta bertan entrenatzen diren kluben jarduera islatuko du.
