Zerbitzuak, Vitoria-Gasteizko Emakumeen Etxean kokatua, etxeko eta zaintza lanetan diharduten langileei beren lan eskubide eta betebeharrei buruzko informazioa eskaintzen die, hala nola kontratazioa, soldatak edo lanorduak. Halaber, behar duten emakume bakoitzaren beharretara egokitutako laguntza eskaintzen du, guztiak feminismoaren aldeko ahalduntzearen esparruan.
Erabiltzaileei lan eskubide eta betebeharrei buruzko informazioaz gain, udal baliabideei, atzerritarren izapideei, ziurtagiri soziolaboralen kudeaketari eta ikasketak baliozkotzeari buruzko datuak ere ematen zaizkie. Arreta hau telefonoz zein aurrez aurre eskaintzen da, asteazkenetan Emakumeen Etxean. Uztailan 11:30etik 13:30era bitartean eta irailatik aurrera, 17:30etik 19:30era bitartean. Aurretiaz hitzordua eskatu behar da 945 16 13 14 telefonoan edo emakumeenetxea@vitoria-gasteiz.city helbide elektronikoan.
Berdintasun Zerbitzuak doako prestakuntza ere eskaintzen du, kolektiboki ahalduntzeko eta ikasteko. Aurten, 'Ekonomia feminista zaintzan eta lan eskubideak: Etxeko eta zaintza lanak egiten dituzu?' ikastaroa izango da. Irailaren 12, 19, 26an eta urriaren 3an izango da, 17:00etatik 20:30era bitartean, Emakumeen Etxean. Izen-emateak irailaren 4ra arte daude zabalik, 633 23 53 12 telefonoan.
Ikastaroak 16 orduko iraupena izango du, eta amaitzean, parte hartzaileek egiaztagiri bat jasoko dute. Irailaren 12an zaintza sistema eta etxeko lana ekonomia feminista ikuspegitik landuko dira; hilaren 19an, Etxeko Zerbitzuaren Legea, kontratua, soldatak, lanorduak, oporrak eta atsedenaldiak; eta 26an, nominak, bajak, kaleratzea eta finikitoa.
Urriaren 3an, etxeko eta barneko zaintza lanak eta lanaren auto-antolaketa ekonomia sozialetik aztertuko dira. Azken saioan, data zehazteke dagoena, ziurtagiriak banatuko dira.
Berdintasun Zerbitzuak, era berean, material didaktikoak eskaintzen ditu udal webgunean, etxeko eta zaintza lanen garrantziaz sentsibilizatzeko, langileak beren balioa ezagutu eta baldintza duinak eskatzeko ahalduntzeko, eta beren lan eskubideak ezagutu eta gauzatzeko tresna praktikoak eskaintzeko. Orain arte, kontratu-eredua, lanaldia, soldata, Gizarte Segurantzako kotizazioak, langabezia-eskubidea, barneko etxeko lana, kaleratzea, kualifikazioa, nominak, errolda, indarkeriak eta ekonomia feminista lantzen zituzten aleak zeuden eskuragarri.
Berritasun gisa, gaurtik aurrera eskuragarri daude egoiliarren nazionalitateari, kapital-bizitza gatazkari, osasunari eta laneko arriskuen prebentzioari, atzerritarren araudiko erroldei, ekonomia sozial eraldatzailetik lan antolatzeko beste modu batzuei eta etxeko eta zaintza lanetan osasun mentala zaintzeari buruzko koaderno pedagogikoak.
