Deialdia gaur argitaratu da BOTHA Arabako Aldizkari Ofizialean, eta edozein pertsonari irekita dago, nazionalitatea edo bizilekua edozein dela ere. Proposamenak hilaren 13tik aurrera aurkeztu ahal izango dira.
Iaz hasitako bideari jarraituz, lehiaketak hiru fase izango ditu. Lehenengoan, parte-hartzaileek dosier digital bat aurkeztu beharko dute, hiru eta bost lan artean bilduz, horietatik gutxienez bi kartelak izan beharko direlarik. Epaimahaiak lan horien estiloa eta kalitate artistikoa baloratuko ditu.
Hautagaitza horien artean, epaimahaiak bost finalista aukeratuko ditu. Bigarren fasean, hautatutako bostek kartel bat sortu beharko dute, Andre Maria Zuriaren jaietako izaera islatuko duena. Finalista bakoitzak 500 euroko ordainsaria jasoko du. Hirugarren fasean, epaimahaiak kartel irabazlea aukeratuko du bost lanen artean.
Kartel irabazlearen egileak 2.500 euroko saria jasoko du orotara: 2.000 kartela beragatik, finalista izategatik irabazitako 500 euroez gain.
Kartelak testuak euskaraz eta gaztelaniaz jaso beharko ditu, euskarari lehentasuna emanez, eta jaietako datak adierazi: 2026ko abuztuaren 4tik 9ra. Udalak maiatzaren 15ean jakinaraziko ditu bost finalistak, eta kartel irabazlea ekainaren 12an ezagutaraziko dute.
