Aurtengo San Nikolas festak abenduaren 5etik 8ra ospatuko dira. Festak antolatzeko, orain arte bezala, hiru bilera egingo ditu herriko festa-batzordeak datozen asteetan. Lehenengo topaketa urriaren 7an izango da, asteazkena, 19:00etan Kultur Etxean.
Bilera horren aurretik, 2026ko San Nikolas festei begira, proposamenak helarazteko aukera zabaldu du Udalak. Horretarako, kultura2@orio.eus helbide elektronikoa erabili daiteke. Herriko eragileek ez ezik, festen antolaketan parte hartu nahi duten herritarrek ere aukera dute beren ideiak eta iritziak bidaltzeko.
Antolatu diren bileren egutegia eta helburuak honakoak dira:
- Urriak 7, asteazkena, 19:00etan Kultur Etxean: Festa egunak eta programazioaren oinarriak zehazteko bilera. Udalak posta bidez jasotako proposamenak aurkeztuko ditu, eta parte-hartzaileek ere berenak aurkezteko aukera izango dute. Horiek taldean aztertu eta programazioaren lehen zirriborroa osatuko da, Orioko San Nikolas festen izaera eta balioak kontuan hartuta.
- Urriak 21, asteazkena, 19:00etan Kultur Etxean: Proposamen berriak aurkezteko aukera egongo da, aurreko bileran zehaztutako oinarrien gainean. Halere, bileraren helburua programazioaren ikuspegi orokorra erabakita uztea izango da.
- Azaroak 4, asteazkena, 19:00etan Kultur Etxean: Programa ixteko bilera izango da, jarduera, artista, ordutegi eta gune guztiak zehaztuta. Gainera, behar teknikoak zehaztuko dira eta eragileen arteko koordinazioa bideratu.
Udalak eragile eta herritarrei egiten die dei, festa-batzordeko saioetan parte har dezaten. Guztion iritziak eta proposamenak jasotzea garrantzitsua dela azpimarratu du erakundeak, festak guztion artean eraiki ahal izateko.
