Zumaiako kultur talde eta eragileek estreinatu zuten atzo, azaroak 12, Kaperako auditorio berriko oholtza, musika eta dantza emanaldi berezia eskainita. Jon Maia eta Libe Yeregi aurkezle izan ziren, eta bertan parte hartu zuten Zumaiako Musika Eskolak, Zumaiako Musika Bandak, San Pedro Abesbatzak, Astindu Dantza Elkarteak, Txistulari Bandak, Zumai Txarangak, Zutrik Trikitilari Elkarteak eta Musika Eskolako dultzaineroek, Akaleia artistarekin batera.
Musika eta dantza uztartu zituzten emanaldiotan, bakarka zein elkarlanean egindako saioekin. Astindu Dantza Elkarteak eta San Pedro Abesbatzak elkarrekin jardun zuten, txistulariek eta Zutrik Trikitilari Elkarteak beren piezak eskaini zituzten, eta Akaleia artistak abesti berri bat aurkeztu zuen. Amaieran, Musika Banda, banda txikia, abesbatza eta txaranga elkartu ziren hainbat pieza eskaintzeko.
Kaperako auditorioa, Komentua Kultur Topagunearen barruan kokatua, kontzertuak eta ikuskizunak hartzeko egokituta dago. Formatu eta estilo desberdinetako musika emanaldiak ez ezik, herriko elkarteen jarduerak, formatu txikiko dantza eta arte eszenikoetako ikuskizunak, hitzaldiak, proiekzioak, performanceak, tailerrak eta mintegiak ere egin ahal izango dira bertan. Aretoak eserlekuen eta harmailen sistema malgua du, eta 126 lagunentzako lekua eskaintzen du eserita egiteko emanaldietarako, eta 300 inguruko edukiera zutikako kontzertuetan. Gainera, musika grabazioetarako ekipamendua du.
Gune berri honen helburuetako bat Zumaian antzemandako zuzeneko musika emanaldiak eskaintzeko espazio publikoen gabeziari erantzutea da, herriko musikari eta kultur eragileen jarduera hartzeko. Eraikin historikoari erabilera publiko berria emateko proiektuaren baitan, San Jose komentua musikaren, dantzaren eta antzerkiaren inguruko jarduerak biltzeko gune bilakatu da.
San Jose komentua 1609an sortu zuen Francisca Labayen Hernandez de la Torrek. Mendeetan zehar egokitu eta berritu ondoren, 2008an Karmeldar Oinutsen Komentuko ahizpak joan zirenean, eraikina udalaren jabetza publikora igaro zen. 2019an, Udalak kultur topagune bihurtzea erabaki zuen, eta 2020an parte-hartze prozesua abiatu zuen eragileekin batera, eraikinaren zaharberritze eta eraldaketa proiektua lantzeko. Obretan, eraikinaren ondarea eta mojen memoria zaintzea ere helburu izan da, eta hainbat altzari eta artelan zaharberritu dira. Laster bisita gidatuak ere eskainiko dira.
Komentua Kultur Topaguneak hainbat erabilera eta zerbitzu bilduko ditu, besteak beste, Zumaiako Musika Eskola eta herriko kultur elkarteak. Zumaiako Musika Banda, San Pedro Abesbatza, Txistulari Banda, Astindu Dantza Elkartea, Sapere Aude Sinfonietta eta Zutrik Trikitilari Elkartea dira proiektuaren bidelagunetako batzuk, eta 2025eko irailean hasi ziren lehen kideak bertan jarduten.
