Aurreko asteburuan barraketan, parrandan, danborradan eta kontzertuetan gozatu ondoren, Zumaia prest dago San Telmo festen errepikapenei ekiteko. Atsedenaldi labur baten ostean, herria berriro ere murgilduko da jai giroan, ekintzaz betetako egitarau batekin.
Igandeko gauerdian Kofradian bandera jaitsi aurretik, zumaiarrek eta bisitariek aukera izango dute hainbat jardueraz gozatzeko. Udalak jakinarazi duenez, Zumaiako Herri Eskolakoen sardina-jana larunbatean izango da, eta ez igandean, hasiera batean iragarri bezala. Gainera, ostiralean eta igandean San Telmo ermita bisitatzeko aukera egongo da, 11:30etik 13:30era.
Ostiralean, Eusebio Gurrutxaga plazan igel toka eta pote txapelketa irekiak egingo dira, adin-tarte desberdinetarako, Beheko Plaza elkarteak antolatuta. Arratsaldean, Txatori omenaldia labarrean, Amaiako plazan III. Irrintzi Lehiaketa eta Oxforden bertsofesta bat izango dira. Gauean, txosnagunean Bertsio Gaua ospatuko da, hainbat talderen bertsioekin.
Larunbatean, Eusebio Gurrutxaga plazan 26. Olagarro Zopa Lehiaketa egingo da, Elustondo anai-arrebak trikitilariek alaituta. Goizean zehar, Bizijolas jolasak eta tailerrak ere izango dira plaza berean. Saregile plazan, Zumaiako Herri Eskolako irakasle eta familien eskutik sardina erreak dastatu ahal izango dira. Arratsaldean, Odietan herri kirol ikuskizuna eta Kofradian Iagomagoren Etorri eta ikusi ikuskizuna. Gauean, Realaren eta Atletico Madrilen arteko Errege Kopako finala ikusteko pantaila erraldoia jarriko da Odietan, eta kontzertuak izango dira txosnagunean eta Torreberrin.
Igandean, Zumai txarangarekin goiz soinua herriko kaleetan zehar, eta Itzurun hondartzan zaldi lasterketa. Arratsaldean, trainerillen estropadak egingo dira errioan: 41. San Telmo saria gizonezkoentzat eta XII. San Telmo saria emakumezkoentzat. Egunari amaiera emateko, Samba Badago taldearen kontzertua eta Olgetan taldearekin erromeria Kofradian, gauerdian bandera jaitsi eta santelmoei agur esan aurretik.
