Zumaia ko Udalak irailaren 19an egingo den Olarro Eguna ren harira antolatuko den azokaren xehetasunak jakinarazi ditu. Gastronomia, itsas mundua eta olagarra ardatz izango dituen ekitaldi honetan parte hartzeko aukera izango da Eusebio Gurrutxaga plazan, goizeko 10:30etik 14:30era. Izena emateko formularioa abuztuaren 17an, astelehenarekin, irekiko da eta irailaren 1era arte egongo da eskuragarri.
Horrez gain, Udalak dei egin die herriko elkarteei Olarro Eguneko txosnetan zein herri bazkarian parte hartzeko. Irabazi-asmorik gabe lan egiten duten eta kirol, kultura edo gizarte arloan jarduten diren elkarteek eman dezakete izena. Txosnen kudeaketarako, talde arduradun bat eta gutxienez 16 urtetik gorako 20 pertsona beharko dira egunaren bezperan olagarroa mozteko eta brotxetak prestatzeko. Jai egunean, 09:00etatik 23:00etara, 15 eta 20 pertsona arteko lan taldeak arituko dira txosnetan.
Herri bazkariaren zerbitzua kudeatuko duen elkarteak azpiegiturak muntatzeaz, 400 lagunei arreta emateko materiala prestatzeaz, platerak zerbitzatzeaz, txartelak jasotzeaz eta karpara sartzeko kontrolaz arduratuko da. Bazkalostean, garbiketa eta jasotze lanak ere bere gain hartuko ditu, gutxi gorabehera 25 pertsonen laguntzarekin.
Interesa duten elkarteek abuztuaren 19a baino lehen eman beharko dute izena Turismo Bulegoan, 943 14 33 96 telefono zenbakira deituta edo turismoa@zumaia.eus helbidera idatzita. Ondoren, Udalak bilera antolatuko du zereginen banaketa zozketaz erabakitzeko eta lanen xehetasunak azaltzeko.
Elkarteek dirulaguntzak jasotzeko ezarritako baldintzak bete beharko dituzte, hala nola Gizarte Segurantzarekin eta Ogasunarekin zorrik ez izatea. Gainera, jarduera euskaraz egiteko gaitasuna eta edariak zerbitzatuko dituzten langileen adin nagusitasuna bermatzea eskatuko da.
