Zestoa Osasuntsu taldeko kideak izango dira larunbatean, abuztuaren 29an, eguerdiko 12:00etan udaletxeko balkoira igo eta suziria pizteaz arduratuko direnak. 2015az geroztik, talde honek hirugarren adineko pertsonei zuzendutako egitasmoa sustatzen du, haien bizitza aktiboa eta sozializazioa bultzatzeko helburuarekin.
Taldearen sorrera Zestoako Udalak antolatutako soinketa ikastaroetatik abiatu zen. Parte-hartzaileek soinketatik harago joango zen talde bat osatzeko nahia adierazi zuten, eta horrela jaio zen Zestoa Osasuntsu. Hasieratik, proiektua herritar guztiei irekia izan da, ez soilik soinketan zebiltzanei.
Gaur egun, Zestoako Zaintza Sarearen barruan kokatzen da egitasmoa, eta hainbat eragilek parte hartzen dute: Jubilatuen Elkarteak, 3Z Elkarteak, San Juan Egoitzak, Gisasola Egoitzak eta Zestoako Udalak. Urtero bederatzi hilabetetan zehar hainbat ekimen antolatzen dituzte, hala nola ikastaroak, hitzaldiak eta ibilbideak, askotan hamaiketako batekin osatuz.
Egitasmoaren helburu nagusia da hirugarren adinekoen artean bizi-ohitura osasuntsuak sustatzea, sozializaziorako gune bat eskaintzea eta bizi-kalitatea hobetzea. Jarduera fisikoa eta kirola sustatzeaz gain, egoera zaurgarrian edo bakardadean dauden pertsonen integrazioa erraztea ere lehentasun dute.
Parte-hartzaileek azpimarratu dute Zestoa Osasuntsu "kalera ateratzeko aitzakia bikaina" dela, eta irteerak "benetako terapia" direla berentzat. Jarduerak doakoak dira eta mugikortasun zailtasunak dituzten pertsonak ere kontuan hartzen dira.
Egitasmoa aurrera eramateko, hainbat herritarrek borondatezko lana egiten dute, besteak beste, hamaiketakoa prestatzen lagunduz. Horien artean daude Antton Etxeberria eta Arantxa Rezabal, txupinazoan protagonismo berezia izango dutenak: Etxeberriak suziria jaurtiko du eta Rezabalek hitz batzuk esango ditu balkoitik.
Taldeko kideak "ilusioz" eta "eskertuta" agertu dira jasotako aitortzagatik. Txupinazoaren ostean, lanean jarraitzeko asmoa dute eta herritarrak ekimenetan parte hartzera gonbidatu dituzte.
