Urola Kostako Udal Elkarteak (UKUE) turismo teknikari berria izango du aurrerantzean, Veronica Garcia. Ion Arozena UKUEko presidenteak azpimarratu duenez, "turismo teknikariaren kontratazioa urrats garrantzitsua da Urola Kostak turismoaren kudeaketan egindako ibilbidea sendotzeko eta etorkizuneko erronkei erantzuteko".
Arozenaren arabera, kontratazio honek "lurralde osoari onurak ekarriko dizkion turismo eredu baten aldeko gure konpromisoa" berresten du. Era berean, "Udal Elkartearen eta Gipuzkoako Foru Aldundiaren arteko lankidetza are gehiago indartzeko" balioko du, "eskualdeko turismo eskaintza modu koordinatuan garatzeko eta Urola Kosta urte osoan erakargarria izango den helmuga jasangarri, kalitatezko eta lehiakor gisa sendotzen jarraitzeko".
Joan den ostiralean, Azahara Dominguez, Mugikortasuneko, Turismoko eta Lurralde Antolaketako diputatuak, UKUEko arduradunekin bildu zen eta Veronica Garcia teknikari berria ezagutu zuen.
Dominguezek nabarmendu zuen turismo teknikariak "aberastasuna eta enplegu egonkorra eta kalitatezkoa sortuko duen turismo ereduaren kudeaketan aurrera egiteko aukera" emango duela. Gaineratu zuen kudeaketa turistikoan profesional kualifikatua izatea ezinbestekoa dela, "Gipuzkoako hirugarren helmuga turistiko handiena" baita, 2025ean 101.758 sarrerarekin, eta "familia-turismorako erreferentziazko helmuga bihurtzeko" ahalegin handia egiten ari dela.
