Azkoitiar askorentzat egutegiko egun garrantzitsua da Urrategiko Eguna, eta aurten ere auzoa jendez bete da ospakizunetan gozatzera gerturatu diren herritar ugarirekin. Azkoitiko Udalak antolatutako autobus zerbitzuak erraztu zuen bertarako joan-etorria askorentzat.
Goizean, bi meza ospatu ziren, 11:00etakoa nagusia izan zelarik. Elizkizunen ondoren, auzoko elkartean janari eta edateko aukera izan zen. Ondoren, musika eta bertso saioak izan ziren, Joanes eta Xabat Illarregi bertsolariekin eta Zabale, Aintzane Agirrebeña eta Lutxurdio trikitilariekin.
Arratsaldean, umeentzako jolasak, puzgarriak eta tailerrak antolatu ziren, eta Maria Arandiaren magia ikusteko aukera ere izan zen. Jarraian, herri kirolen txanda iritsi zen, Haritz Aranguren 'Norde' eta Lierni Osa harri-jasotzaileek eta Julen Alberdi 'Txikia IV' eta Iker Vicente aizkolariek ikuskizun bikaina eskainiz.
Egitaraua Zabale, Aintzane Agirrebeña eta Lutxurdio trikitilariek eskainitako erromeriarekin itxi zen. Aurretik ere festa giroa nagusi izan zen Urrategin; ostiralean mus txapelketa arrakastatsua jokatu zen 47 bikoteren parte hartzearekin, eta larunbatean, berriz, auzotarren arteko harremanak sendotzeko auzo bazkaria egin zen, 60 lagun inguru bilduz.
Bestalde, ohiturari eutsiz, otarraren zozketa egin zen. 0702 izan zen zenbaki saritua.
