Ekimenaren helburu nagusia herritarrak bero boladen arriskuez kontzientziatzea eta Agenda 2030 programaren baitan sortutako klima babesguneen sarea ezagutaraztea da. Instalazio hauek kolore bereziak dituzte, eskualdeko babesguneen identitatearekin bat eginez.
Guardasolak pixkanaka ari dira kokatzen eskualdeko herrietan. Zumarragan dagoeneko instalatu dituzte, eta Urretxun ere lanean hasi dira; zehazki, lehenengoak kultur etxearen ondoko parkean jarri dituzte.
Mankomunitateak adierazi duenez, kokapen zehatzak ez dituzte aurrez iragarriko, herritarren artean sorpresa efektua mantentzeko asmoz. Proiektu honekin, espazio publikoak freskoagoak eta seguruagoak bihurtu nahi dituzte.
