Topaketan erakunde publiko, gizarte-erakunde eta enpresetako 40 ordezkarik parte hartu zuten, proiektuaren ikuspegi orokorra, lortutako emaitzak eta erronkei buruz hausnartzeko. Jardunaldiari ongietorria eman zioten Nagore Alkorta Azpeitiko alkateak eta Iraurgi Berritzeneko lehendakariak eta Begoña Beobide Iraurgi Berritzeneko zuzendariak. Topaketaren aurkezpena eta dinamizazioa, berriz, Itziar Abarisketa, Iraurgi Berritzeneko Enpresa eta Enplegu Koordinatzailearen eskutik egin zen.
Lehen mahai-inguruan, ElkarEKIN Estrategiaren baitan pertsonen inklusioa eta laneratzea sustatzeko egiten ari den lana izan zen hizpide. Bertan parte hartu zuten Koldo Peciña, Gipuzkoako Foru Aldundiko Proiektu Estrategikoen Zuzendaria; Fernando Consuegra, ElkarEKIN Lanean Idazkaritza Teknikoaren arduraduna; eta Marta Senz, Zabaltzen Sartuko Koordinatzailea, Gipuzkoan inklusioaren alde garatzen ari diren ekimenak partekatuz.
Ondoren, UE ElkarEkin 2025-2026 proiektuaren emaitza nagusiak aurkeztu ziren. Saio horretan, proiektuaren garapenaren laburpena egiteaz gain, eskualdeko enpresei egindako galdeketaren emaitzak aurkeztu ziren, enpresen eta inklusioaren arteko harremanari buruzko ondorio nagusiak azalduz. Proiektuari esker, eskualdeko 99 pertsonak 7 prestakuntza ibilbide desberdinetan parte hartu dute. Horietatik 37 pertsonak enpresetan praktikak lortu dituzte eta 52 pertsona laneratu dira.
Jardunaldiaren bigarren zatian, proiektuan parte hartu duten hiru enpresetako ordezkariekin elkarrizketa egin zen: DOMUSA Teknik (María Dominguez), BURNIKER (Alexandra Pausenyuk) eta Manufacturas MARPE (Mikel Santillán). Haien esperientziak ezagutu ziren, laneratze inklusiboaren inguruko erronkak eta aukerak partekatuz.
Topaketa Ana Azkoitiak, Azkoitiko Alkateak eta IBko Lehendakariordeak, itxi zuen, lankidetzaren garrantzia azpimarratuz eta eskualde inklusiboago baten aldeko konpromisoa berretsiz. Partehartzaileen aldetik oso balorazio positiboak jaso ziren.
