Getariak aisialdirako elementu berri bat du orain Sahatsaga Goikoa parkean: tirolina bat. Instalazio hau haurren eta familien gozamenerako pentsatuta dago, eta herritarrek aspalditik eskatutako proiektua da, batez ere txikienek bideratutako eskaeren bidez.
Proposamenak hainbat ekimenen bidez jaso dira, hala nola Alkate Txiki Eguna, aurrekontu parte-hartzaileak eta beste parte-hartze prozesu batzuk. Horrela, udalak herritarren nahiak kontuan hartu ditu herriko aisialdi eskaintza hobetzeko.
Getariako Udalak partida espezifiko bat sartu zuen aurtengo aurrekontuetan proiektua gauzatzeko. Hainbat proposamen aztertu ondoren, Lurkoi enpresak aurkeztutakoa aukeratu zen, “egokiena” zela iritzita. Enpresa bera arduratu da instalazio lanak egiteaz ere.
Tirolina berriak 15.147,99 euroko inbertsioa ekarri du guztira (BEZa barne). Jarduera hau udal estrategiaren barruan kokatzen da, haurren aisialdi eskaintza hobetzeko eta espazio publikoen erabilera sustatzeko helburuarekin.
“"Instalazioa zuzen erabiltzea eta segurtasun arauak errespetatzea garrantzitsua da."
Udaletik gogorarazi dute “instalazioa zuzen erabiltzearen eta segurtasun arauak errespetatzearen” garrantzia. Horrela, espazio seguru, jasangarri eta gozagarria bermatuko da herritar guztientzat.
