Dokumentalak San Martin auzoaren sorrera eta garapena aztertzen ditu, baita bertan bizi izan zirenen eguneroko bizitza eta harremanak ere. Horretarako, 80 urtetik gorako hamaika lagun elkarrizketatu dituzte, guztiak ere ume garaian auzoan bizi izandakoak.

Elkarrizketez gain, ikus-entzunezkoak 70 argazki zahar, oraingo 30 argazki, bideoz grabatutako irudiak, musika eta bertsoak ere biltzen ditu. Guztira, 23 pertsonak hartu dute parte dokumentala ontzeko lanetan, besteak beste, bideogile batek irudiak grabatuz, musikari batek musika jarriz eta bertsolariek bertsoak abestuz.

San Martin auzoa XX. mendearen hasieran sortu zen, langileentzako etxebizitza premia bati erantzuteko. Garai hartako Azkoitiko alkateak bultzatuta, auzolana izan zen eraikuntzaren oinarri. Dirurik ez zutenek lanarekin ordaindu zuten etxea.

Hasiera batean, 99 etxe eraiki ziren, nahiz eta gaur egun 100 izan, 1960ko hamarkadan etxebizitza berri bat gehitu baitzuten. Etxe hauek bi aldiz inauguratu zituzten: lehen inaugurazioa 1927an izan zen, eta bigarrena 1929an, orduko agintari ospetsuenak bertan zirela.