Irailaren 2an, asteazkenez, izango dira estropadak, eta arraunlariak animatzera joan ahal izateko neurria hartu du Mugikortasun, Turismo eta Lurralde Antolaketako Departamentuak, Getariako Udalak egindako eskaerari erantzunez.
Zehazki, Zumaia eta Donostia lotzen dituen Lurraldebusen UK10 lineak zerbitzu berezia eskainiko du: 16:00etan irtengo da Zumaiatik eta 21:00etan Donostiatik. Bestalde, UK11 lineak (Zumaia>Donostia AP-8tik Zarautzen barrena) 16:30ean egingo du irteera Zumaiatik eta 19:30ean Donostiatik.
Azahara Dominguez Mugikortasuneko, Turismoko eta Lurralde Antolaketako diputatuak adierazi duenez, Kontxako Bandera "udako kirol ekitaldi garrantzitsuenetako bat da". Horregatik, "herritarrak estropada ikustera modu jasangarrian, eskuragarrian eta erosoan joan daitezen" nahi dute.
Emakumezkoen sailkatze estropada, berriz, irailaren 3an, ostegunean, izango da. Oraingoz, ez dute iragarri zerbitzu berezirik hitzordu horretarako.
