Aurten abiatutako egitasmoak, Goienerrekin elkarlanean, ateak itxi zituen apirilean izena emateko epean. Gaur jakinarazi du udalak 200 herritar baino gehiagok aurkeztu dutela eskaera, eta Goiener ari dela orain datuak aztertzen, bazkide potentzialen kontsumo ohiturak eta ezaugarriak zehazteko.
Proiektuaren lehen fasean, 150 etxebizitza eta merkataritza establezimendu inguruk jaso ahal izango dute instalazio fotovoltaikoek sortutako energia. Jasotako eskaera kopurua aurreikusitakoa baino handiagoa denez, lehentasunezko irizpideak eta kontsumo profilak hartuko dira kontuan bazkideak aukeratzeko, eta beharrezkoa balitz, zozketa ere egingo dela adierazi du udalak.
Bazkide izango diren herritarren zerrenda zehaztu ondoren, Goienerrek haiekin harremanetan jarriko da irailean, elkartea martxan jarri eta komunitatea aktibatzeko. Udalak azpimarratu du egindako azterketa hau beharrezkoa dela, Karela kiroldegiko estalkian jarritako eguzki plakek sortutako energia ahalik eta modu egokienean banatzeko, instalazioak ez baitu energia pilatzeko gaitasunik eta unean bertan banatu behar baita.
