Espainiako traineru txapelketak ez du ezustekorik ekarri, Orio izan baita faborito nagusia eta ez du hutsik egin. Azken asteetan jokatu diren bost estropadetan –hiru txapelketa ofizial eta Mutriku zein Lekeitioko banderak–, oriotarrek garaipen guztiak eskuratu dituzte. Gipuzkoa eta Euskadiko txapelketetan estu hartu bazuten ere Donostiarrak taldeak, besteak beste, Meira-Moañan hamabi segunduko aldea atera zieten bigarrenari eta hamazortzikoa hirugarrenari, Zierbenari, ur barean eta olaturik gabe.
Gaur gaurkoz, Oriok erakutsi du gainontzeko traineru guztien mailatik gora dagoela. Iker Zabalak, iaz estropada guztiak irabazi zituen plantillaren oinarriari eutsita, taldea indartu egin du. Aurreko denboraldian, Gorka Aranberri eta enparauek errekor berria ezarri zuten Eusko Label Ligan, hogei jardunalditan hamasei estropada irabazita. Lau bandera bakarrik galdu zituzten: hirugarren jardunaldian Donostian, bosgarrenean Zierbenaren aurka Pasaian jokatutako erlojupekoan, hamargarrenean berriz ere Zierbenaren aurka, eta azkenik, Getarian.
Iker Zabalaren irabazle-senarekin, argi dago estropada guztiak irabaztea dela oriotarren helburu nagusia aurten. Nahiz eta lehia guztietan irabazle izatea zaila izan, faktore asko ager daitezkeelako (hutsegiteak, eguraldi aldaketak...), Oriok helburu horretatik gertu egongo dela dirudi, gauzak aldatzen ez badira behintzat. 2026ko Eusko Label Ligan arraun taldeek gutxienez harrobiko bost arraunlari ontziratu beharko dituzte estropada guztietan, arau berri honek talde batzuen errendimenduan eragina izango duelarik, baina ez dirudi Orioren kasua izango denik.
Zierbena izan da Bizkaiko ordezkari bakarra Espainiako txapelketan, hirugarren sailkatuz irabazlearengandik 18 segundora. Aurtengo Zierbena ez da iazko taldea bezalakoa, orduan hiru garaipen lortu baitzituen Eusko Label Ligan. Aurreko urteko Espainiako txapelketan, Dani Perezek zuzendutako taldea bigarren sailkatu zen Orioren atzetik, bost segundora.
Eusko Label Liga irabazteko faborito argia Orio bada ere, ez dago argi zer gertatuko den sailkapenaren beheko aldean. Parekotasun handia aurreikusten da, eta mailari eusteko borrokan arituko diren taldeen artean Ares eta Chapela egongo dira. Biak ala biak Espainiako txapelketan lehiatu ziren, baina ez zuten maila altua erakutsi. Ares kontsolazio txanda irabazi zuen eta Chapela azken-aurreko postuan sailkatu zen.
