Atzo arratsaldean, 16:30ean hasita, Gipuzkoako Trainerilla Ligako bigarren jardunaldia ospatu zen Pasaiako uretan. Bertan, Orio Arraunketa Elkarteko arraunlariek parte hartu zuten, eta gizonezko seniorrek garaipen argia lortu zuten, aurreko jardunaldian bezala.

Gizonezkoen taldeak 13:07,90eko denbora markatu zuen, eta 12 segundoko aldearekin nagusitu zitzaion Hondarribiari. Emaitza honek taldearen sasoi bikaina berresten du denboraldi hasiera honetan.

Kopan ere parte hartzen ari dira oriotarrak, eta bertan ere nagusitasuna erakutsi zuten. Orio B ontziak irabazi zuen estropada 13:14,69ko denborarekin, eta Orio C ontzia bigarren postuan sailkatu zen, ia minutu erdiko atzerapenarekin.

Emakumezko seniorrei dagokienez, Pasaian ere lehiatu ziren. Orio A ontzia hirugarren tokian helmugaratu zen, Zumaiaren (15:10,78) eta San Juan B-ren atzetik. Oriotarrak 23 segundora gelditu ziren irabazleengandik. Orio B, berriz, seigarren postuan sailkatu zen, Zumaiagandik minutu batera.