Eguerdian hasiko da jardunaldia, eta bertako gastronomiaz gozatzeko aukera izango dute herritarrek. Ohiko marmitakoa dastatu ahal izango da, baita herriko tabernen errazioak eta inguruko txakolinak ere.
Aldapa elkartea arduratuko da marmitakoa prestatzeaz. 12:30etik aurrera banatuko dira errazioak, 4 euroan bakoitza. Mahaiak jarriko dira plazan, bertaratzen direnek bertan eta eserita jan ahal izateko.
Marmitakoaz gain, herriko tabernek ere parte hartuko dute, bestelako errazioak prestatuz eta plazan salgai jarriz. Horrela, herritarrek hainbat jaki dastatu eta elkarrekin bazkaldu ahal izango dute.
Txakolin Eguna ere ospatuko da. Inguruko lau ekoizlek hartuko dute parte: Bodega Katxina, Blai Txakolindegia, Arbela Txakolina eta Zudugarai Txakolina.
Sei euroren truke, lau txakolindegietako txakolin-trago bana dastatzeko aukera izango da. Ekimen honek bertako ekoizleen produktuak ezagutarazi eta inguruko txakolinen eskaintza herritarrengana hurbiltzea du helburu.
Parrilla Festaren barruan, urriaren 2tik 4ra bitartean ospatuko den ekitaldi sorta honen amaiera izango da igandekoa. Aurten bigarren aldiz antolatu du Orioko Udalak festa, herriko eragileekin elkarlanean, Orioko ondare gastronomikoa ospatu, ezagutarazi eta belaunaldiz belaunaldi transmititzeko helburuarekin.
Ostiralean, urriaren 2an, parrillak piztu eta sasoiko arrainen pintxo-potea egingo da. Larunbatean, berriz, Herriko Plaza elkarte gastronomiko erraldoi bihurtuko da, eta herritarrek arraina Orioko modura erretzen ikasteko aukera izango dute, herriko parrilleroen laguntzarekin.
