Aizarnazabal eta bere inguruak txirrindularitza proben eszenatoki izan ziren atzo arratsaldean. Bertan jokatu ziren, besteak beste, Joxe Larrarteren zein Gervaisen oroimenezko lasterketak. Aurten, Gipuzkoako txapelketaz gain, Euskadiko txapelketa ere hartu du Aizarnazabalek, eta kategoria desberdinetan banatuta, 50 txirrindulari inguruk hartu zuten parte.

Emakumezkoen 23 urtez azpiko eta elite mailetan, bost txirrindulari lehiatu ziren. Hauek, beste maila guztietan bezala, minutu bateko tartearekin atera ziren bata bestearen atzetik. Maite Urteaga zumaiarrak iazko denbora hobetu eta 20.25.49 denborarekin osatu zuen 14 kilometro eta erdiko ibilbidea, Aizarnazabal, Muniosoro, Bedua eta Zumaia artean. Ayala Serrano sailkatu zen bigarren Euskadiko zein Gipuzkoako txapelketetan, 21.11.99 denborarekin, eta Naya Mangas hirugarren izan zen, 22.19.51 denboran.

Gizonen mailako proba, Gervaisen oroimenezkoa, Aizarnazabalen hasi eta Iraetarantz joan zen. Bertan lehiatu ziren hemezortzi txirrindulariek 21 kilometroko ibilbidea egin zuten. Aitor Agirre zumaiarra bigarren izan zen Gipuzkoako zein Euskadiko txapelketetan, 26.09.54 denborarekin. Ander Otegi 23 urtez azpiko txirrindularia izan zen azkarrena, eta Aimar Alarcia hirugarren sailkatu zen, 26.22.59 denboran.