Orioko Udaltzaingoa herriko bizikletentzako aparkalekuetan eta hiri-altzarietan lotuta dauden bizikleten kontrola egiten ari da. Hainbat bizikleta denbora luzez leku berean egoteak zaildu egiten du aparkalekuen erabilera egokia eta oztopatzen du oinezkoen zirkulazioa.
Udaltzaingoak ardura hartuko du hiri-altzarietan, hala nola bankuetan, barandetan eta posteetan lotuta dauden bizikletak jasotzeko eta zuzenean biltegira eramateko.
Azken urteetan, Udalak bizikleten erabilera sustatzeko neurriak hartu ditu, besteak beste, bizikletentzako aparkaleku gehiago jarriz. Hala ere, horietako batzuetan abandonatutako bizikletak egoten dira maiz, eta horiek ez dute ibilgailuen errotazioa ahalbidetzen, herritarrek beren bizikletak aparkatzeko lekurik ez izatea eraginez.
Arazo horiei konponbide bat emateko, udaltzainek ohar bat jarriko diete hiri-altzarietan lotuta dauden edo bizikletentzako aparkalekuetan abandonatuta dauden bizikletei. Erabiltzaileek 10 eguneko epea izango dute bizikleta bertatik kentzeko edo lekuz aldatzeko.
Epe horretan bizikleta mugitzen ez bada, udaltzainek erretiratu eta biltegian jasoko dute. Ondoren, jabeek bizikletaren jabetza ziurtatzen duen agiriren bat aurkeztuz erreklamatu ahal izango dute Udaltzainen bulegoan.
Udalak martxan jarritako bizikleten erregistroak prozesu hau errazteko aukera ematen du, eta herritarrak beren bizikletak erregistratzera animatu nahi ditu.
