San Sebastian bezperako helduen danborrada bi multzotan banatuko da eta, ibilbidea mantenduko den arren, talde guztiek ez dute geldialdi bateraturik egingo Soreasuko Sebastian Donearen parrokian. Bart gauzatu zen erabakia, plazako espazio faltari erantzuteko bozketa egin ostean. Danborradako Batzordeak proposatutako lehen alternatibak bildu ditu boto gehien: ohiko ibilbidea mantentzea, parrokian geldialdi bateraturik ez egitea eta gauerdiaren aurretik danbor taldeak bi multzotan banatzea.
Horrela, ohiko ibilbidea egin ondoren, lehen hamabi danbor taldeak Plaza Txikia ra iristean, Done Jakue kalea n behera parrokiara joango dira. Gainerako 24 taldeak, berriz, plazara joango dira, ohi bezala. Horrela, bi tokitan banatuta joko dituzte San Sebastian martxa eta haren aurreko eta ondorengo piezak. Parrokian egokitzen zaien taldeek parrokian bukatuko dute danborrada, eta plazakoek, plazan. Asmoa da parrokikoek Udal Musika Bandak kioskoan jotzen duen musika entzutea bozgorailuetatik. Era berean, pantaila bat jarriko dute parrokiaren atarian, plazako giroa ikusteko.
Arazo nagusia 2027an hasi zen, hiru talde berrik –Santiyo taldea, Udal Euskaltegia eta Bertan merkatari elkartea– helduen danborrada n parte hartuko zutela jakin zenean. Horrek 36 talde izatera igaro zuen festa, eta horrek Danborradako Batzordea –udal ordezkariek eta zenbait taldetako ordezkariek osatzen dute– hainbat erabaki hartzera bultzatu zuen, plazako espazio falta aspaldiko arazoa baita.
Espazio faltari aurre egiteko, batzordeak hainbat aukera aztertu zituen. Talde guztietako ordezkariekin bildu ostean, bi proposamen nagusi jarri zituen mahai gainean. Lehenengoak, bi tokitan banatuta jotzea proposatzen zuen, parrokiko taldeek han bukatuz eta plazakoek plazan. Bigarrenak, ia berdina zen, baina parrokian amaitzen zutenek plazara joateko aukera izango lukete gero beste pieza batzuk jotzeko. Hirugarren alternatiba bat ere proposatu zen, Julian Barrenetxeak bultzatuta, parrokiko geldialdia mantenduz eta talde berriak inguruko kaleetan kokatuz.
Erabaki nagusienaz gain, beste zehaztasun batzuk ere landu ziren. Aurrerantzean, taldeen kokalekuen txandakatzea bosnaka egin beharrean hamabinaka egingo da, hamabi talde arituko baitira parrokian. Era berean, taldearen 25., 50. edo 75. urteurrenean parrokian jotzea tokatzen zaion talderik balego, plazan jotzeko aukera eskainiko zaio salbuespen gisa.
