Laguntzek hilean 300 euro arteko dirulaguntza jaso ahal izateko aukera ematen dute, alokairuaren %75eraino estaliz. Aurreko urteko araudiarekin alderatuta, erroldatze-baldintza bost urtetik hirura murriztu da, diru-sarreren mugak handitu dira eta hileko gehienezko dirulaguntza 250 eurotik 300 eurora igo da.
Laguntza jaso ahal izateko, eskatzaileek 18 eta 35 urte bitartean izan behar dute, Getarian ohiko bizilekua izan eta alokairu-kontratuak gutxienez urtebeteko iraupena izan behar du. Gainera, Gaztelagun eta Emantzipa programak kontuan hartuko dira, udalaren laguntza subsidiarioa edo osagarria izango baita.
Deialdi honek 2026ko urtarrilaren 1etik irailaren 30era bitartean ordaindutako alokairu-gastuak hartuko ditu kontuan lehen ordainketan. Urrikoa, azaroa eta abenduko gastuak ere sartuko dira, eta horien ordainketa 2027ko hasieran egingo da, gastuak justifikatu ondoren.
Eskaerak aurkezteko epea 15 egun baliodunekoa izango da, iragarkia Gipuzkoako Aldizkari Ofizialean argitaratu eta hurrengo egunetik aurrera. Eskaera-orria Getariako Udaleko harreran eta udalaren webgunean eskuratu ahal izango da, eta aurrez aurre zein telematikoki aurkez daiteke.
