Getariako Udalbatzak irailaren 29an hartu zuen erabakia, EH Bilduaren aldeko 6 boto eta EAJren 5 abstentziorekin. Zerga berria 2027ko urtarrilaren 1etik aurrera sartuko da indarrean, eta Getarian egiten diren turismo-egonaldiak hartuko ditu barnean.
Ordenantza hau Gipuzkoako Lurralde Historikoko Egonaldi Turistikoen gaineko Zerga arautzen duen 3/2026 Foru Arauak ezarritako esparruaren barruan prestatu da. Udalak, horren harira, informazio-gutuna bidaliko die herriko ostatu-establezimenduei, zerga berriaren ezaugarriak eta kudeaketari lotutako betebeharrak azaltzeko.
Zerga honek Getariara bisitari ugari etortzeak sortzen dituen beharrei erantzuteko udalaren zerbitzu eta baliabideak finantzatzen lagunduko du. Turismoak udalerrian duen eraginari aurre egiteko, Udalak urtean zehar hainbat zerbitzu eta jarduera garatzen ditu, eta bisitarien etorrerak udal-zerbitzuak finantzatzeko baliabideak indartzea du helburu.
Zergak Getariako udalerrian egiten diren egonaldi turistikoak hartzen ditu barne, gaualdia eginda zein egin gabe. Hotelak, pentsioak, apartamentu turistikoak, kanpinak, nekazaritza-turismoko establezimenduak, landetxeak, aterpetxeak, erabilera turistikoko etxebizitzak eta Getariako portuan geldialdia egiten duten itsas gurutzaontzi turistikoak sartzen dira.
Tarifak egonaldi-unitate bakoitzeko aplikatuko dira, ostatu-motaren arabera. Zergadun bakoitzeko eta establezimendu berean egindako egonaldi jarraitu bakoitzeko gehienez sei egonaldi-unitate zenbatuko dira.
Ordenantzak hainbat salbuespen jasotzen ditu, hala nola 18 urtetik beherakoen, gizarte-turismoko programen, desgaitasun edo mendekotasun egoeren, ikasketa edo ikerketa arrazoien, osasun-arrazoien eta ezinbesteko egoeren ondoriozko egonaldiak. Salbuespen horiek aplikatzeko, dagokion egoera egiaztatzeko dokumentazioa aurkeztu beharko da.
Ostatu-establezimenduaren titularrak izango dira zergaren ordezkoak eta Udalaren aurrean autolikidazioa aurkeztu eta dagokion zenbatekoa ordaindu beharko dute, hiru hilean behin. Zerga kudeatzeko beharrezko garapen teknologikoa IZFEk, Gipuzkoako Foru Aldundiaren Informatika Elkarteak, egingo du.
Zergak 2027ko urtarrilaren 1etik aurrera izango ditu ondorioak, baina 2026ko otsailaren 5a baino lehen egindako erreserbei dagozkien egonaldiei ez zaie aplikatuko.
