Getariako Arraun Elkarteak bere 50. urteurrena ospatzeko ekitaldi sorta antolatu du. Horren barruan, ostegunean, Aiora Belartieta (Arraun Lagunak-eko arraunlaria eta prestatzaile fisikoa), Mikel Orbañanos (Hondarribia Arraun Elkarteko entrenatzailea) eta Iñaki Arratibel (kirol medikua eta Getariako Arraun Elkarteko medikua hiru hamarkadatan) adituek hitzaldia emango dute.
Saioa gaur arratsaldeko 18:30ean hasiko da Zarautz Jauregiko Talaia aretoan, eta Kepa Iribar kazetariak gidatuko du eztabaida. Bertan, arraunlarien azken urteotako aldaketa fisikoa eta nutrizioaren garrantzia aztertuko dituzte.
Ekainean amaituko da hitzaldi zikloa. Azken saioan, Mikel Olazabal ETBko kazetari zarauztarrak parte hartuko du, arraunean lau hamarkadako ibilbidea egin ondoren. Haren ibilbideaz eta kirolaren bilakaeraz arituko da, Jon Ander De la Hoz solaskide duela.
Udako egitarauak jai kutsua hartuko du. Abuztuan, Salbatore jaietan kuadrillen arteko batel estropadak jokatuko dira. Ekitaldi honek aukera emango die elkartean aritu diren neska-mutil eta gizon-emakume ohiei berriz ere arraunean aritzeko.
