Castro Urdiales-en hasi zen asteburua ligako lehiakideentzat, X. Caixabank Bandera eskuratzeko lehian. Nortindal Donostiarra-k lehen txandan arraun egin zuen, baina ezin izan zien aurkariari aurre hartu. Ziabogan Zumaia baino denbora hobea egin arren, bigarren luzean atzean geratu zen eta 12.19.96ko denborarekin zortzigarren postuan sailkatu zen.
Bestalde, Donostia Arraun Lagunak nagusi izan zen estropadan. Hasieratik hartu zuen burua eta errenta handia ireki zuen ziabogan. Bigarren luzean erritmoa mantendu eta helmugara 11.42,34 denborarekin iritsi zen. Hamabi minututik jaitsi zen ontzi bakarra izan zen eta laugarren bandera eskuratu zuen.
Egun bat geroago, Orioko XXVII. Emakumezkoen Estropada - Orio Kanpina XIV. Bandera jokatu zen. Enara Arruti herritarra ontzian zela, Nortindal Donostiarra-k lan ona egin zuen. Ziabogan Hibaikatik bi segundora geratu zen arren, bigarren luze ederra egin zuen eta lehen txandako bigarren sailkatu zen 11.18,38 denborarekin, Tolosaldea-ren (11.10,20) atzetik. Sailkapen orokorrean bosgarren amaitu zuen Arrutiren ontziak.
Bigarren txandan, Donostia Arraun Lagunak-ek Tolosaldea-ren denbora gainditu behar izan zuen. Ziabogara 05.21 eginez iritsi ziren, tolosarren marka (05.13) hobetzea zaila izan zen. Baina bigarren luzean erritmoa bizitu eta sei segundorengatik, 11.04,28, garaile izan zen Aiora Belartietaren taldea.
Honela, jokatutako jardunaldi guztietan garaipena erdietsi du Donostia Arraun Lagunak-ek eta 40 punturekin ligako buruan da. Nortindal Donostiarra, aldiz, zortzigarren postuan dago, 11 punturekin. Hurrengo estropadak hilaren 18an eta 19an izango dira, Galiziako Chapela eta Bueu herrietan.
