Donostia Arraun Lagunak-ek bere nagusitasuna berretsi du Espainiako Traineru Txapelketan, 'Lugañenea' ontziarekin hirugarren aldiz jarraian garaipena eskuratuz. Galizian jokatu den txapelketa hau irabazita, denboraldi-aurreko hiru txapelketa nagusiak eskuratu dituzte: Gipuzkoakoa, Euskadikoa eta Espainiakoa.
Hasiera batean lehia estua izan dute kantabriar Astillero rekin, baina azkenean bederatzi segundoko aldea atera diete helmugan. Horrela, Perillo eta Tiran sailkatu dira hurrenez hurren hirugarren eta laugarren postuetan. Kontsolamendu finalean, berriz, Chapela izan da garaile Amegrove eta Cabo menderatuz.
Gizonezkoen mailan, berriz, Donostiarra txapeldunorde izan da hirugarren urtez jarraian, Orio ren atzetik. Gipuzkoako eta Euskadiko txapelketetan ere berdina gertatu zen. Getariako uretan baino errazago nagusitu da Orio, San Nikolas traineruarekin. Zierbena eta Cabo da Cruz sailkatu dira hirugarren eta laugarren postuetan, hurrenez hurren. Kontsolamenduko finalean, Ares nagusitu zaio Samertolameu ri, Chapela eta Mecos gaindituta.
Txapelketa ofizialen aroa amaituta, traineru guztiak ligari begira jarriko dira orain. Izan ere, ekainaren 28an hasiko da liga, Madrilen.
