Goizeko ekitaldien ostean, eguerdian ere izan da San Inazio eguneko ospakizunetan parte hartzeko aukera Azpeitia n. Done Jakue kaleko eremu hesituak gazteak eta haiei begira zeuden dozenaka lagun bildu ditu bigantxekin jolasean. Aldi berean, musika eta protesta ekintzak ere izan dira herrian.
Udal Musika Bandak Sanagustin kulturgunea betea zela eskaini du ohiko kontzertua, Unai Frantsesenaren gidaritzapean. Kalean, berriz, Gauerdi txarangakoek girotu dute eguerdiko poteo jendetsua. Plazatik abiatuta, indarkeria matxistaren aurkako kalejira ere egin da, Haujijijaik eta Itaiak deituta, "Eraso ororen aurka!" lelopean.
Familia ugari elkartu dira eguerdi partean kalean, eta ohiturari jarraituz, elkarrekin bazkalduko dute jarraian. Arratsaldean eta gauean ere ekitaldiak izango dira, besteak beste, Holi hauts festa, zezen txikiak eta zezenketa, Alurr dantza taldearen ikuskizuna, eta hainbat kontzertu.
Eraso ororen aurka!
Arratsaldeko eta gaueko egitarauak zezenketa profesionalak, pilota partida eta hainbat kontzertu ditu, besteak beste, Leihotikan, Neomak eta Streetwise taldeen eskutik. Jaiak su festa batekin eta kontzertuekin amaituko dira goizaldera arte.
