Zale horietako asko atzo gauean, 23:00ak aldera, irten ziren herritik. Bidaia hau antolatu duten taldeen artean, Etxe-Zuri tabernak bi autobus bete ditu, 104 lagunekin. Taberna honek urte luzez kudeatu ditu Realak Anoetan jokatzen zituen partidetarako klubak antolatutako autobusen txartelak.
Nahiz eta duela bi denboraldi klubak kudeaketa hori digitalizatu, Etxe-Zurikoek gaurko finalerako autobus tradizionala berreskuratzea erabaki dute. Gainera, herriko lagun talde batek beste autobus bat bete du, 50 zale baino gehiagorekin, Azpeitia eta Sevilla arteko joan-etorria egiteko.
Hiru autobusetako zaleek taldeko argazki bat atera zuten Etxe-Zuri tabernaren atarian, bidaia hasi aurretik, une historiko honen oroigarri gisa.
