Omenaldia Txerloian izan zen, Anaitasunako gizonen talde nagusiak Deustoren aurkako partida jokatu aurretik. Bertan, Anaitasunako maila ezberdinetako jokalariek korridore bat ireki zuten zelaian, jokalariari harrera egiteko. Jokalari azkoitiarra Errege Kopa aldean zuela zelairatu zen, Ana Azkoitia alkatea eta Ibon Osinalde Anaitasunako presidentea lagun zituela.

Zelai erdian, Osinaldek Anaitasunaren kamiseta eman zion jokalariari bere izenarekin, udaleko ordezkariek lore sorta eta oroigarria eman zizkioten, eta dantzarien eskutik koadro bat jaso zuen. Ekitaldian, Javier Sagarzazu ere gogoratu zuten, hark ere Espainiako Errege Kopa irabazi baitzuen Realarekin Atletico Madrilen aurka Zaragozako Romareda zelaian, 1987an.

Sagarzazuren senideetako bat omenaldian izan zen, eta lore sorta jaso zuen. Oparien ostean, dantzariek aurreskua dantzatu zuten, eta Eneritz Artetxek hainbat bertso abestu zituen. Omenaldiarekin amaitzeko, Eraldatzen musika taldeko kideak zelairatu ziren, taldeak Anaitasunari eskaini dion abestia estreinatzera.