Anaitasuna Kakute xake klubak antolatuta, Azkoitia Hiria txapelketa ospatuko da datorren igandean Kontzejupean. Aurten 44. urtez egingo den hitzordu honetan, hiru jokalariz osatutako hogei taldek neurtuko dituzte indarrak.
Txapelketan parte hartuko duten taldeak honakoak dira: Martintxo, Barakaldo, Santurtzi, Santurtzi Neskak, Zornotza, Liendo, Alfil, Altuna Uria, Beraun Bera, Billabona, Eibar, Eibar Txiki, Gros, Hondarribia-Marlaxka eta Anaitasuna Kakuteren sei talde.
Norgehiagokak blitz erara jokatuko dira, partida bakoitzak hiru minutu iraunez eta jokaldi bakoitzean bi segundo gehiago luzatzeko aukerarekin. Txapelketa sistema suitzarrean oinarritutako 11 txandek osatuko dute.
Anaitasuna Kakuteren esanetan, igandeko ekimena klubaren eguntzat har daiteke, helburua baita taldeko jokalari eta bazkide guztiek elkarrekin xakearen "egun handi bat" ospatzea.
Horrez gain, txapelketak Joxe Azkue omenduko du, haren heriotzaren hamabosgarren urteurrenean.
