Helduentzako saioetan, igandean, Xanti Rodriguez eta Amancay Gaztañaga zuzendariek sortutako Piztiak telesailaren hainbat kapitulu proiektatuko dira 19:30ean. Telesail hau Urrestillako bi baserritan, dendan, herrigunean, Azpeitiko parrokian eta plazan grabatu zen, eta EITBren Primeran plataforman estreinatuko da. Ospel Films ekoiztetxe azpeitiarrak ekoitzi du, EITBren sortzaile berrien deialdiko diru laguntzari esker.

Astelehenean, berriz, Deñe Gracia-Bravo eta Mikel Balerdi zuzendariek egindako Eraman zutela dokumentala eskainiko da 21:00etan. Lan honek 1936ko gerra piztu berritan fusilatu zituzten bi lagunen historia kontatzen du. Hainbat sari jaso ditu, besteak beste, Lekeitioko Euskal Zine Bileran Zilarrezko Antzara eta aipamen berezia, eta Uhezinemaren jaialdian epaimahaiaren eta ikusleen sariak.

Emanaldi horietan, ikusleek zuzendariekin solasteko aukera izango dute, lanen sorkuntza prozesuari buruzko xehetasunak ezagutzeko. Kulturaz kultur kooperatibak antolatu ditu saio hauek.

Haurrentzako zinema emanaldi bat ere izango da igande arratsaldean, 16:30ean hasita, Soreasu antzokian. Tafiti eta lagunak animazio filma euskaraz proiektatuko da, abentura eta komedia uztartuz. Film honek Tafiti surikata gaztearen eta Bristles basurdearen arteko adiskidetasun istorioa kontatzen du, ezusteko gertakariz betea.