Azpeitia ko Udaleko Festa Batzordeak erabaki du aurten euskal dantzak izango direla haurren karrozaren gaia. San Sebastian egunez, haurren danborrada ixteko aterako den karroza dotoreak eta Jai Karnabaleko artzain-inudeen kalejirak gai hori jorratuko dute. Erabaki hau hartzeko, herriko festa nagusietan dantzariek duten presentzia eta Itsatsi eta Sahatsa dantza taldeek 50. urteurrena ospatzen ari direla kontuan hartu da.
Lehiaketa irekia da pertsona zein talde guztientzat, eta lanak edozein teknika edo material erabiliz egin daitezke. Proiektuek sortu berriak izan beharko dute, eta egileak izango du erantzukizun osoa. Gainera, diseinuak genero ikuspegia kontuan hartu beharko du, emakumeen eta gizonen egoera eta beharrizanak aintzat hartuz.
Karrozaren neurriak 2,80 m-ko zabalera, 3,85 m-ko luzera eta 3,20 m-ko altuera izango dira. Lanak sinatu gabe aurkeztu beharko dira, eta egilearen datuak gutunazal batean zehaztuko dira. Aurreproiektuak aurkezteko epea azaroaren 27an amaituko da. Epaimahaiak, bost pertsonak osatua, proiektu bakarra aukeratuko du eta irabazleak 1.500 euroko saria jasoko du. Epaimahaiaren iritziz proiektuek ez badute behar adinako kalitate edo baliorik, lehiaketa hutsik gera daiteke.
Proiektuak Azpeitiko Udalera bidali beharko dira, helbide honetara: Azpeitiko Udala. Festa batzordea. Enparantza nagusia, 5. 20.730 Azpeitia.
