Tolosako San Joan jaiak ekainaren 19tik 24ra ospatuko dira aurten, eta dagoeneko hasi dira antolaketa lanak. Apirilaren 14an, Tolosako Udala k deituta, lehen bilera irekia egin zen jai batzordea osatzeko. Orain, udalak jaiak iragartzeko kartel lehiaketaren eta txupinazoaren inguruko xehetasunak eman ditu.
Herritarrek aukera dute txupinazoa nork botako duen proposatzeko. Horretarako, udalaren webgunean eskuragarri dagoen galdetegia erabili ahal izango da maiatzaren 11ra arte, 14:00etan amaituko delarik epea. Proposamenak aurkezteko, Tolosan erroldatuta egon behar da eta 16 urtetik gorakoa izan. Gainera, udalaren Herri Entitateen Erregistroan jasota dauden elkarteek ere aurkeztu ditzakete hautagaitzak.
“"Pertsonak, taldeak edo elkarteak proposatu daitezke txupinazoa botatzeko hautagai modura. Hala ere, zenbait ezaugarri bete behar dituzte, hala nola, herriarekin lotura izatea, Tolosari ekarpena egin izana, komunitatearen ongizatea bilatzea, bizitza kultural edo soziala sustatzea eta zenbait balio sustatzea, hala nola, kultura, genero berdintasuna, aniztasuna, euskara eta gizarteratzea."
Jasotako proposamenak Kultura, Festak eta Gazteria Saila k aztertuko ditu, eta ondoren Jai Batzordera eramango dira behin betiko erabakia hartzeko.
Bestalde, azken urteetan bezala, herritar batek diseinatuko du San Joan jaietako kartela. Lehiaketa irekia dagoeneko martxan da, artista afizionatu zein profesionalei zuzenduta. Lanak aurkezteko epea ere maiatzaren 11n amaituko da. Parte-hartzaile bakoitzak gehienez hiru irudi aurkeztu ditzake, eta hautatutako diseinua udalaren publizitatean eta jaietako iruditerian erabiliko da.
Proposamenak aurkezteko oinarriak udalaren webgunean kontsultatu daitezke. Garrantzitsua da irudiek generoen arteko oreka izatea, rol eta estereotipo tradizionalak indartu gabe, eta sexu, arraza, adin, kultura edo sexu orientazioagatik gutxiesteko tratamendurik gabe.
