Tolosako udal liburutegiak aste honetan ireki du 2026-2027 ikasturteko irakurketa taldeetarako izen-ematea. Eskaintza zabala prestatu dute adin tarte guztientzat, eta saioak urritik maiatzera bitartean izango dira, hilabetean behin, Errota eraikineko hirugarren solairuan. Jarduera hauek doakoak izango dira, eta dinamizatzaileek aukeratuko dituzte irakurketak, liburutegiak parte-hartzaileentzat aleak eskuratzeaz arduratuko delarik.
Haurrentzat, 3-6 urtekoentzat, Ipuin Txokoa saioak antolatu dira. Miriam Mendoza ipuin kontalariak gidatuko ditu saioak, aurten astelehenetan, 18:00etatik 19:00etara. Parte hartzeko, aurrez aurre eman beharko da izena liburutegian, saio bakoitza baino astebete lehenago. Lehen saioa urriaren 5ean izango da, eta izena irailaren 29tik aurrera eman ahal izango da.
Gazteei dagokienez, bi irakurketa-klub eskainiko dira: bat 10-13 urtekoentzat eta bestea 14-18 urtekoentzat. Bi taldeak Nadin Hussein Hernandezek dinamizatuko ditu, ostiraletan. 10-13 urtekoen saioa 18:15ean izango da, eta 14-18 urtekoena, 16:30ean. Lehenengo hitzordua urriaren 16an izango da. 10-13 urtekoek 27 ipuin zopa hartzeko liburua irakurriko dute, eta gazteenek Esnearen kolorekoa. Izen-ematea irailaren 15ean, 16:00etatik aurrera, udal webgunearen bidez egin beharko da.
Helduentzako irakurketa-kluba, +16 urtekoentzat, Monica Leivak dinamizatuko du. Saioak astearteetan izango dira, 18:00etan, gaztelaniaz. Lehenengo irakurketa, urriaren 20an, Margaret Atwooden Por último, el corazón izango da. Ikasturteko gainerako irakurketak liburutegiko webgunean kontsulta daitezke. Izen-ematea zabalik dago jada udal webgunearen bitartez.
Gainera, zeinu-hizkuntzako zerbitzua egongo da eskuragarri saio guztietarako, aurrez eskatuz gero. Informazio gehiago jasotzeko, 943 69 74 62 telefono zenbakira deitu edo liburutegia@tolosa.eus helbidera idatzi daiteke.
Bestalde, Jabetze Eskolak bi talde antolatu ditu: 'Euskal emakume idazleen irakurketa feminista', Oihana Iguaran bertsolariak gidatuta, ostegunetan 18:00etatik 20:00etara Andragora Tolosaldeko Emakumeen Etxeko 3. gelan. Lehen saioa urriaren 15ean izango da, Katixa Agirren Barne zerbitzuak liburuarekin. Bigarren taldea, 'Literatura de mujeres del mundo', Mertxe Tranche Iparragirrek dinamizatuko du asteazkenetan, 18:00etatik 20:00etara, Andragorako 5 eta 6 geletan.
Galtzaundi Tolosaldeko Euskaltzaleen Elkarteak ere antolatzen ditu helduentzako euskarazko tertulia literarioak, Yurre Ugartek dinamizatuta. Lehen hitzordua irailaren 30ean izango da elkartean bertan, Plaza Berrian, Danele Sarriugarteren Beste zerbait liburuarekin.
