Josu Ibarbia k, taldeko entrenatzaileak, denboraldi «oso positiboa» eta «oso baikorra» izan dela adierazi du. Hasierako bolada onaren ostean beherakada bat izan bazuten ere, bigarren itzulia «zoragarria» izan dela nabarmendu du, hamazazpi partidatik bakarra galdu baitute. Ibarbiak azpimarratu du taldeak aurrerapauso garrantzitsua eman duela, bai talde moduan baita jokalari bakoitzak ere.
Hirugarren Mailara ligako irabazlea igotzen da zuzenean, eta bigarren sailkatuak igoera fasea jokatzeko aukera du. Tolosa CFk 57 puntu eskuratu ditu, 15 partida irabazi, 12 berdindu eta 7 galdu ondoren. Ibarbiak azaldu duenez, igotzea ez zen helburua, batez ere jokalari gazte asko baitzituzten taldean, sei edo zazpi jokalari jubeniletatik igo baitziren eta «maila ikaragarria» eman dutenak.
«Helburua taldea eraikitzen joatea zen, hazten joatea, urte batzuetara ahalik eta ondoen prestatuta egoteko. Helburu horiek soberan bete direla esango nuke», esan du Ibarbiak, taldearen eta jokalarien hobekuntza nabarmenduz.
Ohorezko erregional mailan talde bakoitzak «ilusio handia» duela dio Ibarbiak, eta erronka handia izan dela talde lehiakorra osatzeaz gain, emaitzak lortzea eta maila ona erakustea.
Ibarbiak lehen urtea izan du senior mailako talde bat entrenatzen, eta «izugarrizko ikaskuntza» izan dela aitortu du. Entrenatzaile gisa konfiantza hartzeko eta futbola beste modu batera ikusteko balio izan diola gaineratu du, eta klubari eskertuta dago emandako aukerarengatik.
Datorren denboraldian, Eneko Martija tolosarra izango da entrenatzaile berria. Ibarbia, berriz, Antiguoko klubeko ohorezko mailako jubenilen taldeko bigarren entrenatzaile arituko da Unai Gazpio ren gidaritzapean.
