Ekainaren 13an ospatuko den Pilotari Egunaren atarian, Txulue elkarteak antolatutako gizonen bi eta erdiko txapelketako lehen kanporaketa aurreko norgehiagokak jokatu ziren atzo arratsaldean. Partidek ikusmin handia sortu zuten, eta herritar ugari bildu zen Kontzejupearen inguruan lehen neurketak ikusteko.

Guztira, 25 pilotarik eman dute izena bi eta erdiko txapelketan. Koadroa osatzeko, bederatzi kanporaketa aurreko partida jokatuko dira egunotan. Atzo bost partida jokatu ziren, eta gaur beste lau norgehiagoka ikusteko aukera izango da, 18:00etatik aurrera. Gaurko partidetan, Julen Aranburu-Txorrotxa, Zapirain-Iraitz Korta, Gaztelu-Xomorro eta Lizertza III.a-Kuku arituko dira aurrera egiteko lehian. Aste honetako irabazleek eta kanporaketa aurreko partidak jokatu gabe gelditu diren pilotariek datorren astean jokatuko dituzte final zortzirenetako kanporaketak.

Gizonen bi eta erdiko txapelketaz gain, binakako txapelketa bana ere jokatuko dute gizonek zein emakumeek. Gizonen binakakoan 42 bikotek eman dute izena, eta emakumezkoetan, bi bikotek. Txapelketa guztietako finalak Pilotari Egunean bertan jokatuko dira.

Bestalde, Txulue elkarteak Pilotari Eguneko kamisetak eskuratzeko modua aldatu du aurten. Ez dira Kontzejupean salduko, baizik eta eskaerak Internet bidez egin beharko dira. Horretarako, herritarrek formulario bat bete beharko dute maiatzaren 11 baino lehen, eta bertan kamisetaren kolorea eta neurria aukeratu. Partiden egunetan, Kontzejupean bertan kamisetak probatzeko aukera egongo da, eta eskaerak egin dituztenek ekainaren 3an, 4an eta 5ean jasoko dituzte.