Udako kultur eskaintza uztailaren 12an hasiko da Larramendiko plazan, Eraitsi SL kaleko antzerki taldearen eskutik. Egitarauak hilabete osorako ekitaldiak biltzen ditu, besteak beste, Bea Larrañagaren klown ikuskizuna, Tolosako Udal Musika Bandaren emanaldiak eta Zuhamu dantza bertikala. Abuztuan, Ignacio Arakistain eta Hodeiertz abesbatzaren emanaldiak, 1936ko Liburuen Erreketaren irakurraldia eta Petti eta Etxeko Uztaren kontzertuak izango dira.
Irailaren 11n eta 12an, Zumardiaundian izango da eskaintza nagusia. Lehen egunean, IOI Haatik eta Jone San Martin en dantza ikuskizunak, eta Mugan taldearen eta Bele Lide Hernandoren musika proiektuaren kontzertuak izango dira. Bigarren egunean, berriz, Kattalin eta Nenufarrak, Bengo eta Gere arituko dira, eta J.M.Brutal antzerkia ere ikusgai izango da.
Bestalde, irailaren 12an, Tolosaldeko sortzaileen azoka antolatuko da Zumardiaundian, 11:00etatik aurrera. Eskualdeko artisauak eta ekoizleak ezagutzeko aukera emango duen azoka honetan parte hartu nahi dutenek uztailaren 16ra arte dute izena emateko aukera, kultura@tolosa.eus helbidera idatzita. Arropa, serigrafia, pintura eta bitxigintzan diharduten ekoizleei dei egin zaie, beren sorkuntzak ikusgarri egiteko eta elkarren arteko harremana estutzeko.
Uztailan zehar, Leidor aretoan zinema emanaldiak ere izango dira, igande eta astelehenetan. Karteldegia Tolosa.eus webgunean kontsultatu ahal izango da.
Udako kultur eskaintza landa auzoetara ere zabalduko da, 'Beste plazak' egitasmoaren barruan. Emanaldietara joateko, doako joan-etorriko autobus zerbitzua egongo da. Autobusa emanaldia hasi baino ordubete lehenago aterako da San Frantzisko pasealekuko geltokitik. Abuztuaren 29an Aldabara, irailaren 5ean Bedaiora eta irailaren 26an Urkizura joateko aukera izango da. Zerbitzua doakoa bada ere, aldez aurretik izena eman beharko da kultura@tolosa.eus helbidera idatzita, plaza kopurua eta harremanetarako datuak zehaztuz.
Kulturak eskualdeko plazak hartuko ditu uda osoan zehar, ekitaldi anitz eta auzoetara zabaldutako eskaintzarekin.
