June Aranburu (Tolosa, 2009) eta Libe Curras (Tolosa, 2011), Alpino Uzturre iraupen eskiko taldeko kideak, emaitza nabarmenak lortu dituzte amaitu berri den denboraldian. Lorpen horiei esker, nazioarteko lehiaketetan parte hartzeko aukera izan dute, beraien maila altua erakutsiz.
Aranburu 18 urtez azpiko mailan lehiatzen da, baina sarritan absolutu mailako eskiatzaileekin neurtzen da. Euskal Herrian, bere kategorian lehen postua lortu du, eta hirugarrena absolutu mailan, bai esprintean bai distantzian. Espainiako Txapelketan, bigarren izan da bere mailan distantzia luzean (skating) eta esprintean (klasikoa), eta absolutu mailan bosgarren eta zazpigarren postuak eskuratu ditu, hurrenez hurren. Curras, berriz, 16 urtez azpiko mailan, hirugarren izan da distantzian eta bigarren esprintean Espainiako Txapelketan. Espainiako Kopan lehen postua lortu du, eta Euskal Herriko txapelketetan ere garaipenak eskuratu ditu.
Elurrik ez dagoenean, Alpino Uzturre ko kideek gurpil gaineko eskietan edo rolleskian entrenatzen dute. Modalitate honetan ere, Aranburuk seigarren postua lortu zuen Espainiako Txapelketako esprintean absolutu mailan, eta bigarren distantzian. Euskal Herrikoan, bigarren izan zen absolutu mailan. Currasek, berriz, bigarren postua eskuratu zuen Espainiako Txapelketako esprintean eta lehenengoa distantzian, Euskal Herrikoan esprintean garaile izan zelarik.
“"Beti dago zerbait hobetzeko, baina kontuan izan behar da Espainiako Txapelketan senior mailakoekin lehiatzen naizela eta zailagoa egiten zaidala emaitza onak lortzea nire kategorian baino."
Bi eskiatzaileak pozik agertu dira lortutako emaitzekin, nahiz eta beti hobetzeko tartea dagoela aitortu. Aranburuk nabarmendu duenez, Tolosan bizi eta goi mailan eskiatzeko erronka handia da, elur guneak urrun baitaude. Hala ere, lortutako emaitzek Espainiako selekzioarekin nazioartean lehiatzeko aukera eman diete, eta hori oso baloratzen dute.
Curras nazioarteko bi probatan izan da: Skiri Trophy herrikoian eta Fesa Cup-ean, azken honetan Espainiako selekzioarekin. Aranburu ere Fesa Cup-ean lehiatu zen. Bertan, Europako beste eskiatzaile batzuekin alderatuta, entrenamendu baldintzen arteko alde handia nabaritu dute. Aranburuk 35. postua lortu zuen 18 urtez azpikoetan, eta erreleboka lehen hamabosten artean sailkatu zen. Currasek 29. postua eskuratu zuen bere mailan.
“"Espero nuena baina handiagoa izan zen. Azken finean, eskiatzea beraien egunerokotasunean sartuta dago. Guk bi ordu pasa behar ditugu eskiatzera joateko."
Ekainean hasten dira serio entrenatzen, udan gurpil gaineko eskietan, bizikletan, korrika eta gimnasioan aritzen direlarik. Elurra iristen denean, asteburuetan eskiatzera joaten dira, eta astean zehar gurpil gaineko eskiak, korrika eta gimnasioa uztartzen dituzte. Denboraldia martxoaren amaieran amaitu zen, eta apirilean atseden hartzen dute.
